Das isch myni Wiehnachtsgschicht........

Jedes Jahr uf Wiehnachte, het mir mis Bärner - Grossmuetti es Päckli gschickt. Die Päckli si für mi immer öppis bsunderigs gsi,  wöu sie si voll mit Schläckereie gsi.   Am Heiligabe si bi mine Eutere immer Lüt iiglade gsi, wo süsch niemer hei gha. Anstatt dass sie alleini hei müesse Deheime hocke, het se öpper us der Verwandschaft gäge Abe abgholt und zu üs bracht. 

A däm Abe won i möchte verzeue, isch ou der Konrad, en alte Schnydermeischter us Aarwange bi de igladne Gescht gsi. Er isch es chlyses, dünns Männdli gsi und me het gseit, er läbi sehr sparsam. Teils het me sogar gseit er sigi z'gittig, um sich säuber öppis rächts z'Ässe z'gönne. Usser em Konrad sy no en alti Tante und ihre Maa und em Muetti si Brüeder am Tisch ghöcklet. Meischtens het es de Paschtetli zum z'Nacht gä. Das heige alli gärn und liggi nid schwär uf, het s'Muetti gmeint. Nach em Ässe  isch me de i d'Stube züglet, wo's Wiehnachtsböimli gschtande isch. Meh het so gschtuehlet gha, dass alli imene Kreis ums Böimle ume hei chönne hocke. Unger em Tanneboum isch für alli es chlises Päckli gläge. Die hei aber no chlei müesse warte. Zersch han i uf der Blockflöte müesse "Stille Nacht, Heilige Nacht" spile. Nachär isch es de am mir gsi, all die Gschänkli zverteile. Für mi isch äbe das Päckli vom Bärner-grosi parat gläge. Süferli han i s'Packpapiir wäg gno und der Dechu ab der Schachtle glüpft. Jetz han i all die guete Sache, eis nach em andere uf e Tisch usegleit, E chlyne Bluemechööli, es paar Härdöpfeli, e Tomate, Banane, Rüebli, Bire und e wunder schöne Öpfu, aues us Marzipan. So öppis han i no nie gseh, oder gschänkt übercho gha. Was mir aber bsunders is Oug gschtochen isch, isch es rosarot's Söili us Marzipan gsi wo im Schnörri e Schoggibatze gha het. "Das wirden i nid ässe, das duen i nume ufsteue," han i zu mim Brüeder gseit und ha das Söili uf d'Zyte gschteut. Es het o no anderi Sache i dere Schachtle gha......chlyni Zuckerzibeli wo i orangschfarbegi Papierli si igliiret gsi und zu nere Chötti zämegmacht si gsi, Schoggigäld, Frigorschöggeli und Schoggimüsli mit ere farbige Zuckerfüllig.           Wo die alte Lüt ihri Nastüecher, Socke und Händsche hei uspackt gha, het mini Muetter zu mir gseit:"So, und jetz geisch mit dire Drucke mit all däm Gschläck vo eim zum andere und jedes darf sich öppis usenäh." Am liebschte hät i die Marzipansache usegno, es hätti ja no gnue anders drinne gha. "Nüt isch," het mi Muetter gseit und i ha sogar mis Söili müesse i d'Schachtle zrügg legge. Es sigi nid höflich, wenn me Sache vorhär däti useläse, wöu me nid möchti Teile. Jet het mir nume no d'Hoffnig ghulfe, dass niemer gärn Marzipan het. D'Tante het es Frigörli und es Zuckerzibeli use gno. Der Unggle het sich mit emene chlyne Härdöpfu begnüegt und het mir derby zueblinzlet. So, jetz wäri die Rundi scho fasch überschtande gsi, nume der Konrad het no uf mini Schachtle gwartet. I stah vor däm dünne Schnyderli, won er siner chochige Finger wie ne Habicht i d'Schachtle het und promt das rosarote Marzipansöili usenimmt!!! Mir isch s'Ougewasser zvorderisch gschtande, wo mini Muetter zu mir seit;" Du überchunnsch no mängisch so Marzipansache. Aber der Konrad isch en alte Maa und het sicher no nie so nes Söili gha."                                  Mi Muetter het rächt gha. I ha no meh vo dene Sache übercho, und der Konrad isch gli drufabe gschtorbe. Aber i bsinne mi no guet, dass i denn - als öppe acht jährigs Meitschi -  nid sehr chrischtlechi Gedanke ha gha; I ha nämlich dänkt: Das gscheht ihm jetz grad rächt! 

Euch allne schöni Wiehnachte und alles Guete im neue Jahr!!!

 

D'Meitschi düe glüschtele

Am Morge duen i als erschts d'Huustüre uf und d'Chatzebuebe chöme hurtig ine. Sie si nid die ganzi Nacht dusse, aber so am Morge zwüsche 3 und 4i wei si eifach use.
Auso hei sie Hunger und überchöme aus erschts öppis z'Morge. I due es Büchsli uf und de steiht ou üsi Ester i der Warteschlange.
Wöu miner Hundemeitschi erscht chli später ihres z'Morge is Gschirrli überchöme, duet me umso meh gluschte. Me ma däne Chatze das Fuetter absolut nid gönne und spanniflet wien e Häftlimacher, öb de ächt no öppis zum Uuschläcke überig blibi.

I säge de immer: schön warte! Sogar der Beni (Tiger) wartet öb d'Esther no chlei öppis uf em Tällerli zrügg laat......er het vor de Hünd Vortritt!

Het de ou dää Chatzebueb gnue.......

de geit es ume Ändspurt und jedes darf es Tällerli suber Usschläcke. Das isch üsi Morgeroutine und um daas ume chunnt me nid.
Morn muess i ganz früeh zum Huus us und der Urs muess die Raubtier Füetterig mache. Er meint; Eh das wird dänk e kes Problem si! Hesch du en Ahnig!!!!!

Was machsch du gärn?

I ha Bsuech gha und mir si chlei mit de Hünd gange. So ab em obsi loufe fragt mi s'Trudi:"Was machsch eigentlich hie am liebschte"? I bi e Momänt blibe stah und luege mi langjähregi Kollegin us der Schwiz läng aa. "Meinsch jetz was miner Hobbies si? Auso i ha eigentlich die gliche Hobies wie i der Schwiz. I lise gärn, due no lieber Schrybe und due gärn Fötele das machen i scho lang." Ja aber du hesch doch aubes o no glismet?" Het sich s'Trudi richtig erinneret. "Stimmt, aber das chan i nümme, wäge mim Rheuma i de Dumeglänk." Oh du Armi, du hesch doch aubes so schöni Sache gmacht.....überall hesch dini Lismete derby gha."
"Ja das geit jetz haut nüme so guet,  derfür han i glehrt Wulle Spinne und agfange Male han i ou"....
I gloube s'Trudi het mir gar nid richtig zueglost, es het immer no dranume gschtudiert, wie ächt das isch, wenn me plötzlich nüme cha mache was me einisch gärn gmacht het.
I ha de wyter ufzeut...."weisch" han i gseit, "i ha so viel gwunne hie, won i gärn mache, dass i gar ke Zyt meh hätti zum Lisme. Die viele Blueme won i ums Huus ume ha und mis chline Grüenhuus, das han i haut i der Schwiz ou nid gha......miner Tier.....
"Ja und go Velofahre? Geisch o nüme go Velofahre?" "Nei i fahre hie nid Velo, es het mir uf em Highway zviel Verchehr."Derfür gan i jede Tag mit mine Hundemeitschi uf em Bärg ga Loufe, das han i i der Schwiz so haut o nid gha."
Me chas chehre und dräie wie me wott, alles git es äbe nid. Aber es muess doch eifach unger em Strich für eim passe. 
Später han i mir die Frag, was ich hie gärn mache, no einisch chlei düre Chopf la ga und mir isch ufgfalle, dass i eigentlich fasch alles gärn mache. 
Im Momänt bin i am Holz Bige für nächscht Winter.....ja ich mache das gärn. Es isch en Arbeit wo mi freut, wo Sinn macht und mir Glägeheit zum Nachdänke git.
Die meischte Arbeite machen i ja für üs und warum söu i se de nid gärn mache?

Zuefall oder nid

 I gloube dra, es git kener Zuefäll......aues isch für eim bestimmt und macht Sinn. Mängisch gseht mes nid grad sofort, erscht nach äre gwüssne Zyt, dämmerets eim und me gseht e Zämehang. So wie bi mir.......

Da wohnen i fasch dryssg Jahr im Seeland und unger einisch faht es i mim Läbe a fa räble. Es geit Schlag uf Schlag und aues füegt sich zäme, fasch wie wenn eim e frömdi Macht würdi stosse und müpfe. Me wird Muetig und trouet sich Sache zue, wo me sich nie hätti chönne vorsteue.

No hüt nach achtzäh Jahr, frag i mi mängisch,  wien i das Uswandere so packt ha. Aber es het so müesse si, es isch mi Bestimmig gsi. Erscht hie, han i chönne zu däm Mönsche wärde, won i hüt bi......

Wenn i am  Morge mit de Hünd ga go loufe, chan i nume zum Huus us und scho sie mir z'Mitz i der Natur. Niemer ebchunnt is uf üsem Wäg.....mir si ganz allei. Es isch die beschti Zyt für mi um d'Gedanke chönne z'Büschele und um Danke z'säge. 

Me cha säge was me wott, aber e so im Grüene, zwüsche de Böim, cha me e Chraft und Energie gschpüre, wo eim enorm guet düe. 

I bi gärn underwägs uf üsem Bärg, ha die alte chnorzige Würze und Boumstümpf gärn. 

Die Wasserquelle chlei wyter hinger, het s'ganze Jahr Wasser, was für s'Wild wo hie läbt sehr wichtig isch.  Das gseht me a däne viele Spure und Wägli wo sie zum Wasser d'trappet hei. Es duet mir guet z'wüsse, dass die Quelle nid trochnet, ou wenn der Summer läng und heiss isch.

Es git nid nume Wald, es isch ou offe und hie uf däre Lichtig bin i sehr gärn. Me gseht zwar nid würklich wyt, wäge all däne Höger, aber es isch trotzdäm schön. Mit em Fäldstächer cha me mängs beobachte, i der Luft und am Bode.
Hie obe dänken i ou a miner Lüt i der Schwiz, wo mängisch äbe nid so chöi nachvollzieh, dass sich miner Wärtvorstellige so gänderet hei, sit i hie läbe.

E Toblerone Chueche

Gseht er nid gluschtig us dä Bärnerchueche vo de Tobler? Scho länger han i ne gseh stah im Tiefchüehlfach, näbe de Chees cake. I ha sehr gärn Toblerone Schoggi - wo me ou hie in Canada,  fasch überall cha choufe.  Nach es paar ne Wuche glüschtele, han i du doch vo letscht eine kouft.  A der Kasse het me mi gfragt öb i ne scho kenni? Öb i ne gärn heigi? 
I ha müesse zuegä, dass i bis jetz no keine kouft heigi und das mi erscht Toblerone Chueche sig. Mir si üs de aber -- wägem Biudli --- einig worde, dass er sicher sehr guet müessi si.
Und natürlich han i wieder müesse säge, dass die Toblerone äbe for Schwiz chäme, wien i!
De het me aubes scho grad es Gschprächsthema.
Item, Deheime hei mir de Chueche aagschnitte und probiert und sie häll begeischteret gsi. Auso so nussig, schoggoladig und glichzytig zart......i ha grad no eine Hei gno.....me weiss drum nie, öb sie das Produkt wieder bstelle. I ha mi de o gfragt, öbs ne ächt i der Schwiz o gäbi? Will, solang i z'Nidau gwohnt ha, han i de Chueche nie gseh.
Us Gwunder dür wän er überhoupt importiert wird, dräjien i s'Schachteli um und lise:
Made in Sweden!!

Dankbar si......

Hüt am Morge won i miner Blueme bschüttet ha, han ni bim Sprützchanne fülle so für mi dänkt, was würdi mir jetz mache, wenn zu däm Schluuch us kei Wasser meh chämti? 
Mir si a keim Netz vor e Gmeind aagschlosse. Wo mir vor 17 Jahr uf üse Bärg züglet si, hei mir säuber müesse luege, ob und wie viel Wasser mir finde. E Kompanie vo Cranbrook het denn zu Mal für üs Wasser gsuecht, gfunde und de bohret.  
Uf  85 Meter abe hei si müesse und dört unger sigi e ganze See, het me üs gseit. Mir hei e gueti Well, sie produziert fasch 3 Gallone (11.35 l) i der Minute. Es isch guets Trinkwasser und Zämesetzig so, dass mir nid müessti filtere. Das mache mir aber trotzdäm, wüues Ise drin het. Das git gärn Roschtfläcke i der Dusche und im WC. I ha am Aafang immer z'Gfüehl gha, üses Wasser "blächelet" und ha de e Britta Filter fürs Trinkwasser brucht. Sit mir jetz eifach e Filter für die ganz Aalag hei, isch aues guet. Derfür hei mir absolut ke Chalk i üsem Wasser.

Aber äbe, es hät o anders chönne ga.....mir kenne Lüt won es Stück Land kouft hei und uf däne ganze 2 ha ke Tropfe Wasser gfunde hei. Ja söttigi Sache si früehcher passiert. Hüt muess me, wenn me wott Land verchoufe, bewiise, dass es ou Wasser gäbti. I finde das nume fair.
Was wott me scho mache ohni Wasser? Es git zwar scho Homesteader, wo ihres Wasser müesse i Kontainer oder Fässer reiche und uuffülle.
Das müesse mir Gottseidank nid und drum han i hüt am Morge wieder einisch "Danke" gseit für de Luxus wo mir jede Tag dörfe bruche......
Me cha aber ou Danke säge wenn me Deheime i der Stadt, der Wasserhahne ufdräit.....ou das Wasser chunnt vo nöime, het mängisch e wyte Wäg und isch nid unerschöpflich und säubschtverständlich. 

Was machsch de ömu o gäng?

E so gsehts bi üs uf em Bärg deune Orte us....fasch wie im ene Naturpark. Es isch ganz e bsunderigi Stimmig dert, meischtens isch es ou ganz ruhig. Ab und zue ghört me Zweige knackse oder Loub raschle. 

Erscht wenn me ganz ruhig isch, ghört me die Stilli. 

Wenn me sich Zyt cha näh und die chlini Wält cha uf sich la würke, de merkt me plötzlich wie um eim ume gschaffet wird. Jede isch mit irgend öppisem beschäftiget. Wenn me Glück het und eim d'Sunne nid zfescht bländet, de gseht me wyt obe am blaue Himmu, e Adler siner Kreise zieh.......

Nüt isch reguliert, aues fliesst und so duet eim ou das Grüüsch vom chline Creek wieder is Loot bringe. Was sueche mir doch gäng viu zwyt für Lösige, vo Problem wo mir üs meischtens no säuber kreiiere. Es ligt nid aues i üsne Händ, mängisch müesse mir eifach la ga und druf vertroue, dass es scho guet chunnt.....oder so wien es chunnt, so isch guet. 

Das isch nid öppis won i gäng ha chönne, aber i bi am Lehre und i dänke, wenn is hie i däre Natur und Rueh nid häre bringe, je wo de?

So mängisch han i uf die Frag (vo Lüt us der Schwyz): "Was machsch de ömu o gäng?" Gar nid so rächt gwüsst was i cha säge, damit es nach öppis tönt. Derby isch mis Läbe so usgfüllt mit Sache, wo anderi Mönsche anschynend so näbeby mache. Wenn i säge, ja i bi haut viu dusse uf em Bärg, ga mit de Hünd.....luege und lose. De chunnt de no gli einisch d'Frag: "Ja aber süsch.....was machsch de süsch?" Sie wei ghöre was i de schaffi, wöu das was i da mache, das geit ja eigentlich under nüt mache.

Ja was machen i de so? Auso, i ha e chline Garte, i ha Rase won i muess mähie, viu Blueme zum Bschütte und das machen i aues vo Hand mit der Sprützchanne. De duen i Chrüttli abnäh (Wullblüemli, Johannischrut, Erdbeeriblätter usw) und i ha Beeri zum Gonfi choche und Schnaps mache....längt das? 

Nei? I hiufe Züün flicke, Böim umsage und Füürholz mache. I mache mis Brot säuber, due Putze und Wäsche und Ufruume, Bache und Choche und mägisch duen i Lisme, Läse, Male oder Spinne....und das mängisch

 ou ohni Wulle! 

Ohhh öppis han i no vergässe, i hocke äbe o no viu am PC und due Schrybe, denn so näbeby han i doch o no es Buech gschribe......    :-)

Jetzt dünkts mi säuber i sigi richtig chnüttu vo däne Sache won i da mache wo nach gar nüt uusgseh!  Danke fürs Läse vo mim Blog......

Das isch es......sorry und please

I gloube es git kes anders Land, wo d'Lüt so hüüfig "sorry" und "please" säge, wie in Kanada. Für aui die wo nid Änglisch verstöh.....Entschuldigung und Bitte. Es isch e sehr sympatheschi Gwohnheit und i ha mi schnäu dra gwöhnt. Chunnt me öpperem i Queri lächlet me nanger aa und seit: "sorry." und wenn me für öppis fragt oder öppis bschteut....immer isch am Schluss es "please." I gloube sogar wenn me öppis beanstandet oder reklamiert, am Schluss heisst es sorry oder please....
Ja me chönnti jetz säge;" jääääää, aber das isch de bestimmt nid immer so ärnscht gmeint!" Nei, das bhouptet ou niemer. Aber es nimmt mängem der Wind us de Sägel, bevor öppis angersch gseit isch.
Wenn i da a die schnoderigi, abschätzigi und ordinäri Sprach dänke, wo i viele FB Gruppe herrscht, de merci schön. Da fäut eifach jedi Basis vom Aastand.....und die wo so rede, die dänke im ärnscht sie sigi cool. 

Das isch mi achtzäht Früehlig hie in Canada uf üsem Bärg und i merke, dass i immer meh Müeh ha, mi mit mire alte Heimat z'Indendifiziere. D'Mönsche hei sich veränderet und das nid nume zum Guete, wies mi dünkt. 
Es befrömdet mi, wenn i hie i der  Bärndütsch Gruppe lise, dass me de Dütsche: "Gashähne" sägi, dass sie nüt chönne und nume e grossi Schnurre heige. Es chunnt no schlimmer, von es paarne git es uf das sogar es lachi Gsicht und der Kommentar; "so guet!" I schäme mi für settigi Zyt- und Eidgenosse. U genau die Tipe pläre de für e Fride uf der Wält.....
I cha nume säge;Gottseidank bin i hie glandet und muess mi däre Veränderig vor Schwyz nüme steue. Aber äbe, mir läbe ja aui uf em gliche Planet und die Iistellig breicht üs aui, öb mir das wei oder nid. Mir si wyter ewäg vom Friede und der Liebi wo mir Mönsche am meischte sueche und bruchte, then ever.........
Drum möcht i no säge.....Danke für aui die Mönsche wo nid so dänke und nid so rede......sie si mi Hoffnig........

Chlei Fitness......

Eis mou won i mit de Hünd am Loufe bi gsi han i so für mi dänkt, dass i eigentlich gärn mou wieder würdi richtig go Fitness mache....mit Maschine und so. Won i no i der Schwyz bi gsi, han i regelmässig zwöi Mal i der Wuche bim Kieser z'Biel, trainiert. Das han i eigentlich no gärn gmacht. Es het mim Rügge guet da und ou süsch han i mi wohl gfüehlt. I ha kener Muckis gha, das isch o nid mis Ziel gsi.....es het mir eifach zgfüehl gä, i düe i öppis guets für mi.

De bin i nach Kanada cho und die erschte paar Mönet han i - Kiesermässig - überhaupt nüt me gmacht. De hei mir agfange uf em Bärg üse Platz ufzboue und mir hei körperlich hert gschaffet. I bi mir das nid gwöhnt gsi und wöu i ou miner Muskle nümme trainiert ha und ou nümme zwänzig gsi bi, het mir das Schaffe aaghänkt. Im Rügge han is gspürt, d'Schultere hei afa weh tue und der Äcke isch verschpannet gsi. "Das geit so nid," han i zum Urs gseit, "i ga morn nach Creston und luege mou wie das Fitness Center vo inne uusgseht." I ha gwüsst won es isch, bi vorhär scho es paar Mal verby gfahre gsi.

 Also, han i mi Täsche packt, so wien i das vo deheime gwöhnt bi gsi und ha vor em Fitness Center parkiert und bi iche. Grad bim Iigang isch es Pult gschtande und dört han i Uskunft übercho. Der Biitrag wäri nid mou e Viertel vo däm vo der Schwyz gsi und me cha cho und go wie me wott. De het mi die jungi Frou umegfüehrt und mir aues zeigt. Irgendwie isch es mir aber nid so wohl gsi.  Es het mi düecht die Maschine sigi o gar nöch zäme.....und die schwitzige, starche Manne uf dene Maschine hei pischtet und bärzet nüt schöners. Es het mi nid gluschtet, als einzigi Frou zwüsche dene Manne ga z'trainiere. 

So bin i wieder use und no an es angersch Ort ga luege, es het gheisse "curves for women." Richtig optimistisch bin i das Studio iche und bi de genau so schnäu wieder uf e Bode cho. Zwar bin i sehr härzlich begrüesst worde, aber vo Maschine ke Spur.  Es paar Chind hei mit Medizinbäll gschpiilt und uf eme grosse Trampolin sie es paar Menonite Froue i ihrne länge Röck umegumpet. Das hätti mi nid gschtört, nei überhoupt nid. Aber usser däne Sache hettes nume no e Sprossewand gä und das wäris de gsi. I ha zu dene hüpfende  Froue zrügg glachet und bi mit emene "see you later" wieder use. 

Hüt, zäh Jahr später, hei mir in Creston e super Sach für Fitness. Zwar git es das won i am Aafang bi ga luege, immer no....für die starche Manne.  Die "gwöhnliche Lüt" hei d'Möglechkeit im nöije Hallebad alles zfinde was me brucht zum Gsundblibe. Wie gseit, äbefurt isch es ganz es schöns Hallebad mit Dampfbad und Hot Top und es grosses Becki zum Schwümme. Uf der andere Syte gits es nichtschwümmer Becki mit ämene Kanal, wo me gäge Strom cha loufe......brucht fei chlei Chraft. Öppe so wie weme duss im Läbe, gäge Strom wott schwümme!!

Im erschte Stock het es de äbe alles für d'Fitness......e Bahn zum Loufe, Loufbänder zum Jogge, Walker und äbe ou Maschine......dört gan i jetz de wieder nach dem länge Winter mi chlei go i Schuss bringe :-)

Warum duurets de ömu o soooo lang........

                 bis ändlich öpperem uffallt, dass da öppisch nid richtig isch? Hüt hei sie a de New's bracht, dass SPCA  (Tierschutz) i der nöchi vo Williams Lake BC, 46 Hünd abgholt heigi. Sächsevierzig!!!!!

Uf emene private Grundstück si die Tier ghalte worde, ohni Unterschlupf und ohni mönschlechi Sozialisierig, verschwige hei sie je einisch e Vet gseh. Die Hünd variere im Alter und natürlich hei sie sich nid nume nach Rasse paaret. Es si American Eskimo, Border Collie, Husky und Samoyed cross. Der Tierschutz vo Williams Lake het uf ihrer Homepage gschriebe, dass jetzt die Hünd z'erscht mou vom Vet untersuecht, gimpft und a der Wärmi gnue z'Frässe und Rueh überchöme.

Es het de ou no gheisse, dass die Hünd schwär wärde z'platziere si......wöu si ganz viel Zyt, Geduld und Verständnis bruchi und wöu sie nid a Mönsche gwöhnt si.....me cha sich das gar nid vorsteue.
So han i haut eifach einisch gschriebe, wöu es mir ke Rueh gla und mi fasch verschrisse het! I ha gschriebe, dass i gärn - wenn Rueh iikehrt isch - eim vo dene 46 Hünd würdi es Deheime gä......
Öpper vo däm Kännel wo die Hünd si,  het mir nume e halb Stund später zrügg gschriebe, dass sie sehr überwältiget si gsi vo dere viele Poscht wo besorgti Mönsche gschriebe und ihri Hilf aabote hei. Das het mir wiederume guet da......het mi chly la entspanne.
Me het mir de ou gseit, dass sie de jede Hund würde uf ihrer Syte usschriebe, wenn er de vermittelbar wäri. Sie würde die Hünd aber nume a Lüt wytergä wo chlei Erfahrig hei mit "Problemfäll" so dass me se nid nach 2 Wuche wieder zrügg würdi bringe wöus nid geit und me sich s'Zämeläbe anders vorgschteut hätti.
Wenn es söu si, de findet üs eine vo dene Hünd und i würd mi fröie ihm d'Liebi und d'Wärmi chönne z'gäh wo so es Tier brucht um gsund und glücklich z'si.

Jetz hänkt's mir langsam aa........

Jetze chunnt die Zyt wieder won i gnue ha vom Winter.....är chönnti jetze abdanke, je ender, je besser! Won i no i der Schwyz gläbt ha, bin i regelmässig im Februar i nes Reisebüro in Nidou, go Feriekatalög reiche. Deheime han i se de uf em Stubestisch usbreitet und systematisch düregluegt, was so i Frag chönnti cho. Scho nume all die farbige Biuder vom endlos blaue Himmu, wytem Meer und exotische Blueme hei mir über die Zyt wäg ghulfe.                                Das seeländische Hudduwätter het mir bis ändi  Winter, immer e liechti Depression gä.  Het me chly usem Näbu use und a d'Sunne wöue, de isch me entweder uf Magglinge gfahre - wes glängt het - oder gäges Berneroberland. E gueti Sach isch ou e Bsuech i der Sauna gis, oder mängisch bin i is Solarium, nume dass i chli Farb übercho ha. Es het mir ömu aubes guet da.

Hie i de Kootenay's won i jetz deheime bi,  hei mir eidütig meh Sunne und tröchner aus äbe i der Schwyz. Nichts desto trotz.....i hätti jetze gnue! I würdi gärn das Bild obe, gäge das Bild unde wächsle.......

I tröime vom Strandwandere.......vo dene chline Wäue wo eim zart über die blutte Füess spüele.......vom ene Ligistuehl und emene guete Buech......vo der Wermi, wo am Schatte so gäbig uszhalten isch......vomene fiine Lüftli, wo eim der Gschmack vom Meer häre treit......s'ruusche vo de Böim. Aber vorallem chönnt i wieder einisch miner Ouge la i d'Wyti wandere.....bis zum Horizont. Das isch für mini Verhältnis wie nes Verwöhnprogramm. In Canada wo mir läbe.....si mir äbe i de Höger und niene gseht me würklich wyt. Drum, es wird langsam Zyt! Obschon i jetz scho weiss, i d'Bahamas wirden is nid mache.....aber das muess es ou nid si. Ou chliy nächer chönnti miner Ouge la i d'Wyti schweife.......

E schöni Geschte

Hüt han i vo der Tierklinik vo Creston die Charte übercho........es het mi sehr gfröit.

I finde es isch e liebi Geschte, wenn me mit sine Hünd für Jahre immer zum gliche Vet geit.
Är kennt üsi Sörgeli und Ängscht und het it de letschte 17 Jahr, mänge tröschtende "Hug"
(Umarmig) müesse gä.
I kenne Lüt, die wei kener Tier meh, wöu früecher oder später chunnt dä Momänt wo me die liebgwunnene Kamerade wieder muess la ga. Me muess d'Verantwortig chönne übernäh und der Schmärz ushalte, wenn es Zyt isch. I würdi nie wöue ohni si, denn wie viu Freud und Liebi liegt doch zwüsch drinne........
I der Schwiz han i nie en eigete Hund chönne ha, drum han i mir, chum in Kanada, grad es Boxermeitschi kouft. Platz hei mir ja gnue gha, Zyt und Liebi ou und s'go Loufe isch für mi hie immer es grosses Bedürfniss gsi.
So isch d'Maite zu üs cho, es 6 monatigs Boxermeitschi.

I bi so happy gsi und ha nid dra dänkt, de no grad e zwöite Hund z'ha. Aber der Züchter vo mire Maite het mir Gschicht vo der Gina verzeut.....emene andere Boxer. Sie sigi es Scheidigschind. Zersch hei sich ihri Mönsche drum gschtritte wär sie darf bhaute und am Schluss het se niemer me wöu. Der Hubert (der Züchter) het genau gwüsst uf weli Art er mi muess näh. Paar Tag später isch Gina bi üs iizoge. Si isch scho 6 jährig gsi aber gsund und für Maite e guete Gschpane.

Gina het sich guet bi üs iigläbt und mir si es guets Team gsi. Do chunnt der Urs mit däre Idee, dass er jetzt unbedingt e Bärner Sennehund wöui.....es het ke Wäg me verby gfüehrt und mir hei gli drufabe es neus Familiemitglied übercho.

Üse Hofhund het der Name Cindy übercho und so si mir nach es paar ne Wuche

z'viert über Bärg gwanderet. Schön isch es gsi........

Schön isch es gsi, aber äbe.....nüt isch für immer.
Wo mir einisch uf em Bärg underwägs si gsi, si miner zwöi Boxermeitschi emene Kojotie hingernache. De het sine buddies grüeft und es het e Kampf gä. D'Maite hei sie i d'Flucht gschlage, aber Gina isch e Kämpfer gsi und sie het nid la ga. Ganz verbisse und mit der schletschte Chraft isch sie heicho. Mir si grad mit ihre zum Vet. Denn bin i vorbereitet gsi, dass sie muess iigchläft wärde. Aber wie gseit, sie isch e Kämpfer gsi und mir hei si no für nes paar Monät gha. Gina het de plötzlich nüme chönne loufe.....es isch doch meh kaputt gsi, weder dass me gmeint het. Sie isch chly meh als 9 jährig gsi, wo mir se de hei müesse la ga.
Jetz si d'Cindy und d'Maite wieder allei gsi.
Wo d'Cindy 4 jährig isch gsi, het sie Problem mit em Chnöi übercho und me het müesse operiere. Sie het sich eifach nid wöue vo däre OP erhole und wo me de d'Cindy grönget het, wöu si gäng ghueschtet het, het sich usegsteut, dass sie Lungechräbs het. Innerhalb 3 Wuche hei mir üs vo üsere Cindy müesse verabschide. I ha lang a däm kätschet......bi richtig chrank gsi.
Der Maite hettes o nid guet do so allei und drum han i mi nach 6 Monet im Tierheim erkundigt, was so für Hünd uf enes Dehei warte. I ha scho d'Papier für nes Golden Retriver Meitschi underschribe gha, wo me mi wieder kontaktiert het und gfragt, ob i ächt nid e 3 jährige Maremma mit viu Problem wetti näh.
So isch im Dezämber 2010, der Pax zu üs cho.

Der Aafang isch taff gsi, aber mir zwöi si schnäu mou gueti Fründe worde. Mini Liebi und Geduld het ihn la vergässe, wie miis mes ihm i sim churze Läbe gmacht gha het. Vorallem s'tägliche Loufe het ihm guet da.
Underdesse isch üsi Maite 11 jährig gsi und e alti Dame. Wöu mir immer lieber meh als 1 Hund gha hei, hei mir wieder für nes Boxerli umegluegt.
Zu mim Geburi im Januar 2011, hei mir es halb verhungerets Boxermeitschi us emene ganze Rudel usegno. Sie het e gueti Chance gha züberläbe, aber äbe, me het guet müesse zu ihre luege.

Der Pax het ke Fröid gha a däm neue Zuewachs, aber irgendwie het de 4 Monät alt Wirbelwind no Puppy Bonus gha. Er het sich de aube mit emene Grummle zrügg zoge.
Nume es paar Monet druf, hei mir ou mini chlini Maite müesse la ga....sie isch 11 Jahr und 3 Monat worde......das isch e richtige Abschnitt gsi. Het doch d'Maite immer alli überläbt gha.
D'Chica het um Gunscht vom Pax buhlet und er het sie o gärn gha und akzeptiert. Es isch luschtig gsi, dene zwene so verschiedene Rasse zuezluege wenn si zäme gschpielt hei.
Es paar Monet später het de der Urs o wieder e Hund wöue.....eine nume für ihn. Är het die 2 jährigi Manu - e Border Collie Mix - us em Tierheim greicht und jetz si mir wieder z'dritt gsi!

Vor zwe Wuche hei mir wieder müesse Abschied näh......der Pax. Nach emene Unfall vor 4 Jahr, isch er handycaped gsi, er het nume no drü Bei gha. Me het gwüsst, dass das de chönnti es Problem gä. Jetz isch äbe Zyt gsi und mir hei wieder mou müesse e Entscheidig träffe.....und wieder hei mir müesse la ga.
Me chas no mängisch mache, es wird nie eifacher, es duet jedes mou weh......
Aber i bi so dankbar, dass mir jetz no die zwöi Meitschi hei, d'Chica (6)  und d'Manu (7)........
I luege jetz nid für ne andere Hund, aber la finde, das duen i mi viellicht scho!

Ärdebodeschön

Hüt bin i mit mine zwöine Meitsche übere Bärg gwanderet. Sit i dr Pax jetz nüme ha, chöi mir das wieder regelmässig mache. Es isch zwar chly müehsam gsi düre Nöischnee, aber i has brucht und es het mir guet da. Eigentlich hätti chönne d'Schneeschueh aalegge, aber mir si aui im gliche Wägli gloffe und de isch es ou eifacher für d'Hünd. Das mache mir immer so und die Wägli wärde de ou vom Wild gärn benutzt.

Geschter han i gseh, dass es Moose (Elch) dür üses Wägli tschaupet isch. Mit ihrne grosse

Schueh het si fei Löcher i die schön uustrappeti Spur gmacht. Hüt isch aues zuedeckt gsi vom neue Schnee und i ha die Tappe nüme chönne gseh. Meh als einisch hets mi drum de gschneut, wenn i so in es Mooseloch (kes Muuseloch!!!) iche trappet bi.

Hie obe si mir chly abghöcklet und i ha die Rueh iigsoge. I ha immer z'Gfüehl, i sigi am schönschte Platz uf der Wält. Hie obe cha me Uftanke und es duet eim i der Seel guet. So viel Natur......und als obs no nid gnue wäri, sie 3 Hirschdame churz uftoucht, um grad wieder hinger de Böim und em Schnee zverschwinde. Wo chönntis mir besser ga, als hie uf üsem Bärg.

Ou wenn mi scho Lüt gfrogt hei wo üs si cho bsueche.....ja aber säg mou, was machsch du hie eigentlich? Es isch ja hie gar nüt?  Ja, wenn mes so aaluegt, de han i nüt! Aber vo minere Syte gseh, han i aues won i bruche, nämlich mini Rueh!

                                             

                                               Isch doch eifach Ärdebodeschon, oder?

scho wieder mitz drin......

So, mir si auso scho wieder mitz drin.....der halb Januar isch scho fasch verby und die guete Vorsätz - insofern me überhoupt settegi het gha - chöme scho langsam wieder is Schleudere!
Das isch überhoupt nid tragisch, me weiss es ja afe, dass es e so wird cho. Nämit dir öich aubes öppis vor, fürs nöjie Jahr? Won i jünger bi gsi, han i das o gmacht, aber jetz, jetz weiss i gar nid, was i no chönnti besser mache, oder was i sötti ändere.....mir isch es äbe grad wohl so wienes isch. Bi zfriede mit däm won i ha und gibe mir Müehi, dass i gäng gsund blibe. I bi äbe scho fasch e Längwylegi....i suufe nid, i rouke nid.......und was i süsch für Mödeli ha, die si nid der Red wärt.....ömu mi störe si äbe nid!
Das isch doch scho mou öppis, wenn me vo sich säuber so überzügt isch, oder? :-)

Der Urs het vor 2 Wuche rächt a d'Seck müesse. Das ufem Foto isch üsi Iifahrtsstrass, sie isch fasch e Kilometer bis a d'Highway abe. Wenn es de so viel Schnee git und aues fasch innert 
 2 - 3 Tag, de muess er de scho grad mit em Traktor ga Pflüege, süsch chunnte me da niene me hi. Me wäri z'letscht iigschneit.....abgschnitte. So gärn i hie usse alleini läbe (mit em Urs und mine Tier) aber das giengti de gar nid. Es isch ja luschtig. Im Winter fahren i meischtens nid meh als einisch ir Wuche is Town (nach Creston 30 Km). Solang i eifach weiss i chönnti wenn i wetti oder müessti, isch aues ir Ornig. Aber wenn i jetz äbe nid chönnti, de wär is es Problem! :-)

Der Urs isch mängisch e chli z'schnäu unterwägs und de het es de äbe ou scho gä, dass er im Ditch (Grabe näbe der Strass) glandet isch.....wie hie. Zersch probiert me de aube mit üsem Pik-up ne usezieh. Aber meischtens bruchts d'Hiuf vo üsem Nachbar wo chly wyter äne wohnt und e grossi Maschine mit Roupe het. De isch aube churze Prozess, aber üsi Iifahrt isch de nach so emene Manöver ou nüme guet befahrbar.

S'Loufe isch im Momänt o nid so es Thema. Der Pax cha i däm höche Schnee gar nid loufe mit sine drüne Bei und es duet ihm o gar nid guet. Aber ou für mi isches e chly schwirig......unger däm Schümeli Neuschnee isch aues veriischet. Wüu nach däm viele Schnee - wo der Urs super gruumet het gha - het's grägnet und de isch es wieder chaut worde......je nu.....
Wenn i so dänke,  wär wott de der Chopf la hange......i öppe 10 Wuche isch es scho wieder Früehlig!
I däm Sinn......heit e gueti Zyt und der nächste Sommer kommt bestimmt! :-)

D'Feschttäg si verby.......

Äbe, mit de Grittibänze het's aagfange....de si Bräzeli cho, Läbchüeche und süsch no viu vo däne süesse, gluschtige Sache. Me het gfiiret und sich rundume schöni Wiehnachte gwünscht. Mir si nach Creston as Wiehnachtskonzärt gfahre und deheime het es de Hamme gä mit Härdöpfugratin. Es isch e schöni Zyt gsi.....me het Wiehnachtsmusig glost und Kerze hei brönnt.
Denn ischs Silveschter cho mit Chlepfmoscht und Lachsbrötli....und mit em Klassiker " Dinner for one". Am  Nöijahrstag hei mir e Brunch gmacht mit säuber gmachtem Zopf und was so derzue ghört.....fein isch es gsi.

Ou wenn mir d'Wiehnachtsdekoration erscht am 6. Jänner abe näh und es de no e Königschueche git, nachär mache mir de ärnscht, nächär geit de der Alltag wieder z'grächtem los.
Aber i muess ou säge, es tönt nach meh, als es eigentlich isch gsi. Der Urs het so viu Schnee müesse ruume, isch für Stunde a der Chäuti gsi, dass er die Ruschtig scho vertreit het. I bi o dusse gsi, bi mit de Hünd ga loufe.....ha die gfrorne Hundegägeli ums Huus zäme gläse, d'Voguhüsli ufgfüllt und no mängs meh und öpper het ja das guete Züüg ou müesse choche :-)
Sie si gäng schön die Feschttäg, i wetti se nid misse, aber wenn sie düre si, de bin i ou wieder froh.