Mittwoch, 2. August 2017

Höflechi Bärner.....


Im Bärndütsch u chli Schnädere het me diskutiert, weli Wortart vo Fründlichkeit äch im Bärndütsch richtig sigi. Auso us grammatischer Sicht, hei äuä die rächt wo säge: "I danke ihne," passt nid eso is Bärndütsche. Es töni irgendwie scho chli "forciert." Won i e jungi Frou bi gsi, han i ou im Verchouf gschaffet. Aber äbe, i ha z'Biel verchouft und das isch fasch scho chli wäutsch aghuchet. Mir hei aube gseit: "Merci und uf wiederluege".
Won i nach acht Jahr in Kanada, s'erscht Mou wieder bi z'Bärn im ne Coop a dr Kasse gschtande, bin i scho chli erschrocke. Die jungi Frou a dr Kasse het mi chum agluegt und s'Muu het si scho gar nid abenang bracht. Uf mis fründliche:"Guete Morge," het sie nume öppis brummlet. Sie het dr Betrag gseit wo's koschtet het und das ou nume, wüu i se läng agluegt ha. Kes: "wenn dr weit so guet si," kes "Danke," kes "Ufwiederluege" sie isch stumm blibe. Sie machi nume ihre Job, het mir de gseit. Nei sie het ihre Job überhaupt nid gmacht!
I wott nid bhoupte, dass es hie in Kanada --- bi üs in Creston --- immer nume höflich zuegeit. Aber so ne Mouggere mache, das chäm de hie gar nid guet a.
Die wo scho mou i üsere Province Ferie gmacht hei oder's süsch kenne, die wüsse, das me hie, wenn me in es Gschäft chunnt mit;"Hi, how are you? ("Hoi,wie geits dir?) begrüesst wird. Meischtens lächle sie sogar, wenn's sie eim frage. Chunnt me de a d'Kasse chunnt die Frag ou wieder und me wird sogar gfragt öb me aues gfunde heigi und so witer. I muess ehrlich zuegä, me gwöhnt sich sehr schnäu a so ne ufgschlossni Art, au wenn's im Prinzip niemer interessiert wie's eim würklich geit. Aber so mängs  amüsants Gschpräch het sich scho ergä, wenn i für miner drü Hünd Fuetter oder/und Gutz uf s'Band bir Kasse gleit ha. Wie mängisch bin i scho gfragt worde, was für Hünd, warum und wieso. D'Canadier sie haut eifach allgemein gschprächiger und ufgschlossner aus d'Schwizer. Denn me redt nid nume mit dene wo scho sit Jahre gueti Chunde si.
Mir hei einisch Bsuech gha vo Schwarzeburg und de het me üs gfragt, was die eim ömu ou gäng fragi, wenn me in e Lade iche chömi oder a dr Kasse stöi? Für die wo's nid kenne, isch es scho fasch chli ufdringlich!   :-)

Keine Kommentare:

Kommentar veröffentlichen

Chica(no) es chlises Gschichtli

Das isch mini Chica, sie isch letschte September sächsi worde. Wo s'Chicceli no es Puppy isch gsy, isch sie es rächts Luusmeitschi ...